Rúrí

Rúrí er meðal áhrifamestu listamanna samtímans á Íslandi og þekkt fyrir fjölbreytt verk sem spanna gjörninga, skúlptúr, ljósmyndun, myndbönd og innsetningar. List hennar byggir á hugmyndafræði og rannsóknum sem tengjast afmörkuðum og knýjandi viðfangsefnum samtímans. Þó viðfangsefnin séu fjölbreytt, snúast þau gjarnan um manninn og samband hans við náttúruna, jörðina og alheiminn. Frá fyrstu róttæku verkum sínum á áttunda áratugnum og til dagsins í dag hefur Rúrí sýnt órofa skuldbindingu við pólitíska og heimspekilega umræðu. Hún hefur þróað einstakar leiðir til að sameina skynræna upplifun og gagnrýna hugsun. Verk hennar hafa ögrað ríkjandi hugmyndum og hvetja áhorfendur til umhugsunar.