Anna María Boga­dóttir

Anna María Bogadóttir er arkitekt sem vinnur með rými og frásagnir þvert á miðla, fag- og listgreinar. Skáldævisaga hennar, Jarðsetning frá 2022, vakti mikla athygli og var meðal annars tilnefnd til bókmenntaverðlauna Norðurlandaráðs og Hönnunarverðlauna Íslands. Verkið spannar einnig samnefnda kvikmynd, gjörning, innsetningu og ljósmyndaseríu og hefur verið sýnt og gefið út hérlendis og erlendis. Anna María lauk meistaragráðu í arkitektúr frá Columbia háskóla í New York árið 2009. Hún er prófessor við Listaháskóla Íslands og rekur stofuna Úrbanistan sem starfar á mörkum arkitektúrs og annarra listgreina í gegnum hönnun, varðveislu, skipulag, útgáfu og rannsóknir á eðli og umbreytingu manngerðs umhverfis.