Hrafn­kell Sigurðs­son: X

Hvert og eitt þeirra er valið með tilliti til einstaks framlags þeirra og sérhæfingar á sínu sviði, bæði hvað viðvíkur miðlum, aðferðum og viðfangsefnum. Slík stöðutaka á sér stað í framsetningu lykilverka frá ólíkum tímum í Vestursal Kjarvalsstaða og útgáfu sýningarskrár þar sem fjallað um ferilinn í samhengi listasögunnar og samtímans.

Verk Hrafnkels draga gjarnan fram andstæður eins og á milli skipulags og óreiðu, menningar og náttúru. Listamaðurinn beinir sjónum að því hvernig mannleg kerfi takast á við náttúrulegt niðurbrot og dregur fram fegurðina í því sem við lítum oft framhjá, til dæmis rusli, sjúskuðu yfirborði og öðru í hverfulleika daglegs lífs. Þótt verk hans spretti oft úr ólífrænu umhverfi, tekst honum á einstakan hátt að kalla fram náin tengsl við mannslíkamann. Verkin eru í senn ljóðræn og hugmyndafræðileg, en búa jafnframt yfir kynngimögnuðum og dulúðugum krafti.

Sýningin veitir yfirlit yfir rúmlega þrjátíu ára feril listamanns ásamt því að sýna ný og áður óséð verk.

Hrafnkell Sigurðsson er fæddur 1963 í Reykjavík og hóf nám í Myndlista og handíðarskóla Íslands 1983. Í beinu framhaldi fór hann út í framhaldsnám í Jan Van Eyck Akademíuna í Maastricht og árið 2002 lauk hann M.F.A. gráðu í myndlist frá Goldsmiths Háskólanum í London. Ljósmyndin hefur verið hans meginmiðill frá árinu 1990 þótt listsköpun hans nái einnig yfir vídeóverk, skúlptúra og innsetningar. Sem ungur listnemi var Hrafnkell einnig meðlimur fjöllistahópsins Oxsmá sem var þekktur fyrir líflega sviðsframkomu og stuttmyndir.