Undir Bárujárnsboga. Ljósmyndasýning

Ljósmyndasýning, - Braggalíf í Reykjavík 1940-1970. Á sýningunni eru myndir úr bók Eggerts Þórs Bernharðssonar teknar af áhugaljósmyndurum og fagfólki. Myndunum er það sammerkt að fanga á áhrifamikinn hátt hversdagslegt líf Reykjavíkinga á þessum árum. Bygging bragganna hófst síðsumars 1940 og fyrstu íbúarnir voru erlendir hermenn.

Síðari heimsstyrjöldin og fyrstu áratugirnir eftir stríð voru viðburðaríkt tímabil í Íslandssögunni. Samfélagið tók stórstígum breytingum og þjóðin þurfti að takast á við nýjar aðstæður. Reykjavík fór ekki varhluta af þessum umbrotum og þar fjölgaði fólki ört. Skortur á skaplegu húsnæði neyddi þúsundir Reykvíkinga til að sætta sig við bráðabirgðahúsnæði af ýmsu tagi og því risu upp ný hverfi braggabyggðar.

Undir 1970 hafði meginþorri reykvískra braggabúa yfirgefið braggana. Ljósmyndirnar á sýningunni eru eftir Helgu Hansen (1916-1987) braggabúa, Jón Bjarnason frá Laugum (1909-1967) og Pál Sigurðsson, en myndir hins síðastnefnda þykja miklar gersemar og hafa margar hverjar ekki komið fyrir augu almennings áður.

Myndvinnslu annaðist Íslenska myndasafnið og Christopher Lund sá um samsetningu mynda. Vegna góðs frumefnis og með tilkomu nýrrar myndvinnslutækni hefur á sýningunni tekist að ná fram metnaðarfullum og skörpum myndum, sem kalla fram á ljóslifandi hátt aðbúnað braggabúa og það samfélag sem myndaðist kringum byggðina en er nú óðum að falla í gleymskunnar dá.