Sara Björnsdóttir: HA

Staðbundnar innsetningar og lifandi gjörningar eru einkenni á höfundarverki Söru Björnsdóttur. Þrátt fyrir hugmyndalegan og gagnrýninn grunn eru verk hennar jafnan unnin af innsæi og tilfinningu, þar sem áhersla er lögð á jafnvægi þessara þátta við hið sjónræna. Hún nálgast viðfangsefni verka sinna á umbúðalausan hátt og leitast þannig við að snerta við skynjun áhorfandans á umhverfinu. Verk hennar geta á stundum virst beinskeytt og ögrandi og inntak þeirra samtímis hápólitískt og afar persónulegt.

Í innsetningunni HA leysir Sara upp hið fasta sýningarými A-salar með lifandi myndum af rýminu sjálfu. Hver mynd fellur inn í þá næstu og saman skapa þær nýja vídd, síbreytilega sjónhverfingu þar sem veruleiki rýmisins og upplifun áhorfandans mætast. 

Sara Björnsdóttir er fædd í Reykjavík árið 1962. Hún stundaði nám í Myndlista- og handíðaskólanum og síðar við Chelsea College of Art & Design í London (MA). Meðal verka hennar má nefna Where Is My Stuff  (Játtanir, Listasafn Færeyja, 2011), Es ist nicht die kunst die stinkt es ist die galerie (Kulturpalast Wedding International, Berlín, 2010), Víma, Ég vildi að þú hefðir meiri tíma og Salem Lights (Möguleikar, Listasafn Reykjavíkur, 2009), 1001 heví bjútí (Ferðalag, Listahátíð í Reykjavík, 2008), Svartur Íslendingur (Sirkus, Frieze Projects, Frieze Art Fair, London, 2008), Intoxication (Gallery Crystal Ball, Berlín,  2007), Hellirinn bak við ennið (Kling & Bang, 2006), Skúlptúr, skúlptur, fokking kúltúr (Ný íslensk myndlist II: Um rými og frásögn, Listasafn Íslands, 2005), Rugl í rými (Sjónarhorn, Listasafn Íslands, 2003), Felumynd (Fljúgandi diskar og önnur undursamleg fyrirbæri, Gallerí Skuggi, 2001).

Sýningarstjóri: Hanna Styrmisdóttir