Milli goðsagnar og veru­leika. Nútíma­list frá arab­aheim­inum

Sýningunni, sem hér kemur íslenskum almenningi fyrir sjónir frá Ríkislistasafni Jórdaníu í Amman, er ætlað að varpa ljósi á heim araba, sem fengið hefur svo mikla athygli á Vesturlöndum að undanförnu, í þeirri von að menningarsamskipti geti leitt til aukins skilnings og umburðarlyndis meðal ólíkra þjóða.

Á sýningunni verður dregin upp mynd af stöðu nútímalistar á þessum slóðum með úrvali verka eftir karla og konur frá sextán mismunandi arabalöndum, en þau eru: Alsír, Barein, Egyptaland, Írak, Jórdanía, Kúveit, Líbanon, Marokkó, Amman, Palestína, Sádi-Arabía, Súdan, Sýrland, Túnis, Sameinuðu arabísku furstadæmin og Jemen.

Verkin á sýningunni veita innsýn í hugarheim þessara listamanna jafnframt því sem áhorfendur fá að kynnast þeim margvíslegu stílum og stefnum sem þar tíðkast. Annars vegar er um ræða verk sem tengjast trúarbrögðum, kynferði og pólitík, og hins vegar getur að líta afturhvarf til hefðarinnar sem dregur listamennina að sagnfræðilegum og trúarlegum uppruna sínum. Íslamstrú leggur enn sem fyrr blátt bann við því að sýna myndir af lífverum á helgum stöðum.

Þrátt fyrir að allir íslamskir nútímalistamenn hafi hlotið skólun á vestræna vísu eiga þeir flestir það sameiginlegt að leita eftir listrænu auðkenni sem sameinað getur uppruna þeirra, menntun og daglega tilveru.