Júlíana Sveinsdóttir og Ruth Smith: Tvær sterkar

Júlíana Sveinsdóttir og Ruth Smith: Tvær sterkar

Kjarvalsstaðir

-

Á alþjóðlegum baráttudegi kvenna, 19. júní 2015, verður opnuð að Kjarvalsstöðum, sýning á verkum tveggja kvenmálara, Júlíönu Sveinsdóttur (1889–1966 ) og hinnar færeysku Ruthar Smith ( 1913–1958), í tilefni af því að hundrað ár verða liðin frá því íslenskar konur fengu kosningarétt árið 1915, en ári síðar hlotnaðist færeyskum konum einnig þessi réttur.

Listakonurnar tvær eiga það sameiginlegt að alast upp á vindbörðum og gróðursnauðum eyjum í Norður- Atlantshafinu, annars vegar á Heimaey og hins vegar á Suðurey í Færeyjum. Báðar settust þær í Listaháskólann í Kaupmannahöfn og urðu, ásamt Kristínu Jónsdóttur, fyrstu konurnar sem gerðu myndlist að ævistarfi i heimalöndum sínum.

Þrátt fyrir langa dvöl í Danmörku máluðu þær fyrst og fremst landslag heimahagana, þar sem þær túlka, með einstöku litaskyni, hin sterku náttúruöfl, og baráttuna milli lands og hafs, sem einkenna heimaeyjur þeirra. Sýningin gefur gott yfirlit yfir feril þeirra sem landslagsmálara en báðar lögðu þær einnig mikla rækt við gerð mannamynda og bregða upp sterkum lýsingum af samferðafólki sínu.

Hér er um að ræða norræna farandsýningu sem ferðast frá Reykjavík til Listasafns Færeyja í Þórshöfn, þar sem hún verður opnuð 11. 9. 2015 en síðasti viðkomustaðurinn er Norðurbryggja í Kaupmannahöfn, sem lýkur upp dyrum sínum 14.11. 2015.

Framkvæmdastjóri sýningarinnar er Helga Hjörvar og sýningarstjóri er Hrafnhildur Schram listfræðingur..