D10 Andrea Maack

Sýningin er hluti af sýningaröð í D-sal Hafnarhússins sem hófst haustið 2007 og er Andrea Maack tíundi listamaðurinn í þessari sýningaröð. Efnilegum listamönnum er gefið tækifæri til einkasýningar í safninu og er þessi salur helgaður verkefninu.

Andrea Maack útskrifaðist frá myndlistardeild Listaháskóla Íslands 2005 og hefur verið virk myndlistarheiminum bæði hér heima og erlendis. Andrea hefur setið í stjórn Nýlistasafnsins frá 2006 og var framkvæmdastjóri Sequences Real Time Festival í Reykjavík 2007.

C R A F T  er sjálfstætt framhald sýninganna WOART frá 2007 í gallerí Suðsuðvestur í Keflavík og SMART frá 2008 í Gallerí Ágúst og var hluti af Listahátíð. W O A R T fjallaði um handlóð í marmaralíki ásamt blýantsteikningu af heilanum sem andlegum vöðva. Hugmyndafræðileg nálgun sýningarinnar fólst í að mynda heild milli hugar og líkama.S M A R T fjallaði um ilm listamannsins. Verkið var búinn til í fjórum eintökum (ekki fjórar mismunandi lyktir) ásamt umbúðum. Samhliða ilminum fylgdu sýningunni 252 áritaðar arkir til prófunar á ilminum.

Andrea vinnur með blýantsteikningar á sníðapappír og hvolfir þar með ákveðinni nálgun í fatahönnun að fá innblástur frá listheiminum. Þess í stað fær Andrea innblástur í verkin sín frá fatahönnun og tískuheiminum.

Andrea vinnur gjarnan með hugmyndir um fegurð, tísku, útlitsdýrkun, líkama, heilsu og dauða hvort sem er í formi teikninga, skúlptúra eða ilmi. Andrea víkkar skynjun áhorfandans og skapar nýja leið til upplifunar.

Hér er um samstarfsverkefni við franska fatahönnuðinn Cedric Rivrain, ilmvatnsframleiðendurnar Happycents og APF – Arômes et Parfumes og innanhúss- og rýmishönnuðinn Ingibjörgu Agnesi Jónsdóttur að ræða. Einnig kom Katrín María Káradóttir að sýningunni.

Tilfinningin í sýningunni er sköpuð út frá sérhæfðum meisturum í hefðbundnu frönsku mátunarumhverfi  sem sýnir einungis einn haute couture hlut.

Mannlegt að vilja stöðugt að bæta sig.

Efnisleg tæling alheimsvæðingarinnar.

Jafnvægið milli ímyndasköpunar annars vegar og frelsi ímyndunaraflsins hinsvegar.