Ásmundur Sveinsson

Erró

Afstaða okkar til staða og umhverfis í tíma og rúmi er Katrínu Sigurðardóttur hugleikin. Hún vinnur með ólíkan skala í skúlptúrum sínum og innsetningum og gefur til kynna fjarlægð og endurlit. Eins og í verkinu hér notast hún við sínar eigin minningar og skeytir saman görðum og svæðum sem eiga það sameiginlegt að hafa verið í námunda við heimili hennar í gegnum tíðina. Katrín útbýr eftirmynd garðanna í eins konar ferðatösku, eins og til að minna á að okkar nánasta umhverfi verður hluti af farteski okkar alla tíð. 

Verkið er frá því snemma á ferli Gjörningaklúbbsins. Vídeóið er skrásetning gjörnings þar sem unnið var með lifandi skúlptúr og að auki koma fjórar ljósmyndir af skúlptúrunum fullgerðum. Nakinn kvenlíkami er undirstaða fjögurra fagurskreyttra veislurétta, súkkulaðiköku, rjómatertu, glassúrköku og brauðtertu. Margendurtekin hlutgerving kvenlíkamans í þágu listarinnar er hér til umfjöllunar á gamansaman en gagnrýninn hátt. Um leið er dregið fram annað minni úr listasögunni, áminningin um dauðleika mannsins.

Í verkum sínum fæst Kristján Steingrímur gjarnan við hugmyndir um staði og hvernig við tengjumst þeim. Hann tekur inn mismunandi umhverfi og aðstæður, safnar þaðan efnum eins og jarðvegi eða sandi og notar í verk sín.

Magnús Pálsson var fulltrúi Íslands á Feneyjatvíæringnum í myndlist 1980. Þar sýndi hann ýmis gifsverk, þar á meðal Sekúndurnar þar til Sikorskýþyrlan snertir, sem sýndi augnablikið áður en Síkorskýþyrla Landhelgisgæslunnar lendir. Þrír gifsklumpar mynda þríhyrning á gólfi - klumparnir eru afsteypa af bilinu milli dekkja þyrlunnar og jarðar. Hér er Magnús að efnisgera það óefnislega. Verkhlutarnir þrír eru af mismunandi hæð sem gefa til kynna tímann í verkinu, stélhjólið er það sem lendir síðast og er því hæst, tíminn er hér kominn í fast efni.

Í myndröðinni Heimsókn beinist stækkunarglerið að landamærum þess náttúrulega og menningarlega. Með því að stilla saman augnablikum þar sem maðurinn er á einhvern hátt gestkomandi í sínu heimalandi, koma í ljós ýmsar myndir sem endurspegla veruleika okkar. Þetta er eilíf glíma við að myndgera ýmsa huglæga þætti tilverunnar og finna fyrir þá viðeigandi sjónrænt tjáningarform. 

Collection