Reykjavík Art Walk App

Gabríela hefur sótt innblástur á ýmsum vettvangi í tilraunum sínum til þess að fjalla um tilfinningar, líðan og allt það sem bærist innra með manninum. Einkum hefur hún skoðað hugmyndakerfi frá fyrri tíð, dulhyggju og forneskju. Hún hefur miðlað niðurstöðum sínum í teikningu, málverki, skúlptúr og myndbandsverkum. Þar koma fram karakterar, táknmyndir og efni sem bera með sér marglega eiginleika og endurspegla völundarhús mannlegrar tilveru.  

Arngunnur Ýr er með BA-gráðu í málaralist frá San Francisco Art Institute og með meistaragráðu í málaralist frá Mills-háskólanum í Oakland. Hún býr bæði í Kaliforníu og á Íslandi og hefur í fjölmörg ár lagt áherslu á landslag í listsköpun sinni.

Þríleikur Magnúsar, Talk Preceding Eye Talk, Eye Talk og Eye Talk II, er uppbyggður með áþekkum hætti hverju sinni, rödd listamannsins er í fyrirrúmi og hann fer sjálfur með textann í mynd. Alltaf er til staðar einhver eiginleiki sem gerir frásögnina framandlega og hún virðist úr lausu lofti gripin. Í fyrsta myndskeiði er Magnús í hlutverki manns sem tekur óhóflega í nefið með tilheyrandi truflun í frásögninni. Öðru sinni sést andlit hans ekki, eingöngu hálsinn, fyrir framan upptöku úr skólpræsakerfi. Loks stillir hann sér upp þétt við kvenmannsbrjóst og nýtur fulltingis konunnar við frásögnina. Ekkert verkanna er klippt eða samsett, þau líða hægt áfram án framvindu eða samhengis.

Myndbandið er tekið með „green screen“ tækni þar sem listamaðurinn sést sitjandi á stól er virðist smár miðað við manninn. Hlutföllin eru á skjön, listamaðurinn situr á hlið og talar út í tómið. Textinn fjallar um fólk, atburði og samskipti en einnig um stærð hluta og umhverfis, skynjun manna á stærð í umhverfi sínu og þau viðmið sem beitt er hverju sinni. Af og til fer allt á flug; myndin hristist og jarðskjálfti skekur manninn og rýmið.  

Þegar þetta verk var fyrst sýnt árið 2000 markaði það afturhvarf til fyrstu olíumálverka Ragnheiðar þremur áratugum áður. Lengst af var hún kunn af svarthvítum, fígúratífum grafíkmyndum sem endurspegluðu femíníska afstöðu hennar. Hér iðar blátt yfirborðið af lífrænum abstrakt formum og sjónum er beint að lagskiptingu málverksins. Ragnheiður er handhafi heiðursviðurkenningar Myndlistarráðs árið 2023.

Fjórum hvítum kössum er komið fyrir í horni sýningarsalarins og á þá varpað hreyfimyndsem vekur hina dauðu hluti til lífsins. Þeir virðast hreyfast, opnast og lokast enauk þess sést banani á ferð og flugi á milli þeirra. Eins og heiti verksins gefur til kynna eru kassarnir í raun fimm, því að einn þeirra sprettur fram úr þeim sem fyrir eru, tekst á loft, svífur um sýningarrýmið og samlagast að lokum nýjum kassa. Inni í kössunum hefur verið komið fyrir tækjum sem framkalla hljóð í takt við myndefnið og fullkomna blekkinguna um hina líflegu kassa.

Collection