D30 Ragnar Þóris­son: Manns­líki

Verkin eru óræð og gefa til kynna lágstemmda hreyfingu bæði í tíma og rúmi þannig að svo virðist sem listamaðurinn reyni að fanga eitthvað sem auganu er dulið alla jafna.

Í málverkum Ragnars sést móta fyrir manneskjum, sveipuðum dulúðugu andrúmslofti. Stórir, marglaga litafletir blandast við fínlega pensilskrift. Verkin eru margræð og gefa til kynna lágstemmda hreyfingu bæði í tíma og rúmi þannig að svo virðist sem listamaðurinn reyni að fanga eitthvað sem auganu er dulið alla jafna. Einhver viðsnúningur á sér stað. Í stað mynda af manneskjum birtast manneskjur sem myndir.

Málverkin taka á sig mannsmynd í gegnum liti og línur listamannsins; þau eru í mannslíki.

Hugur okkar áhorfenda skáldar í eyðurnar og mótar persónur. Þetta eru ólíkir einstaklingar, hver með sín karaktereinkenni, fangaðir í mynd sem tjáir tilfinningu og jafnvel sögu. Rétt eins og listamaðurinn, köllum við fram ýmis minni – fólk sem við þekkjum, ljósmyndir úr fjölskyldualbúmum, sögupersónur úr kvikmyndum, portrettmyndir listasögunnar og þar fram eftir götunum. Málverkin á sýningunni eru frá 2013-17 og bera enga titla. Við höfum því fátt að styðjast við nema myndmál Ragnars og eigið hugarflug. Ragnar er þrítugasti listamaðurinn sem sýnir í sýningarröð D-salar. Hann er fæddur árið 1977 og útskrifaðist frá Listaháskóla Íslands árið 2010. Hann hefur haldið nokkrar einkasýningar, tekið þátt í samsýningum og í sumar tekur hann þátt í hinum Norræna tvíæringi, Momentum, í Noregi. 

Í D-sal Hafnarhússins eru að jafnaði sýnd verk eftir listamenn sem ekki hafa áður haldið einkasýningar í stærri söfnum landsins. Markmið sýningaraðarinnar er að gefa efnilegum listamönnum tækifæri til að vinna innan veggja safnsins og beina athygli gesta að nýjum og áhugaverðum hræringum innan listheimsins. Á árinu 2017 eru áætlaðar alls fjórar sýningar í sýningaröðinni..