Ásmundur Sveinsson

Erró

Útsaumaður damaskdúkur sýnir nákvæmt landakort af Grímsvatnasvæðinu eins og það var 7. nóvember 2004. Hæðarlínur eru saumaðar með kontorsting og gígur sem myndaðist í gosi sem þá var nýafstaðið er saumaður með rauðu. Vélsaumað sikksakk-spor sýnir mælilínur flugvélar við radarmælingar á gígnum. Anna hefur fylgt vísindamönnum í rannsóknarleiðöngrum, skoðað rannsóknaraðferðir þeirra ásamt því að safna efni sem hún nýtir í listaverk af fjölbreyttum toga. Þetta saumaða kort innsiglar samruna hlutlægra vísinda og listrænnar sköpunar.   

Samspil vísinda og lista ræður formi verksins sem fylgir legu vatns í gígnum sem varð til við gos í Grímsvötnum árið 2004. Gatið í miðju þess sýnir form gosefnis sem myndaði eyju í vatninu. Ofan á flekanum eru skjáir sem sýna þrjú ólík myndskeið; upptökur frá rannsóknarflugi yfir gosstöðvarnar í Grímsvötnum, bullandi leirhveri í Vatnajökli, og eldgosið 2004 þar sem fylgst er með framvindu þess og því breytingarferli sem fer af stað um leið og eldgosi lýkur og önnur öfl taka við. Anna tók sjálf þátt í flugferðunum sem farnar voru til að skrá ummerki gossins en árið 1997 byrjaði hún að taka þátt í leiðöngrum vísindamanna á Vatnajökul og skrá vinnu þeirra við mælingar og rannsóknir. Verkið endurspeglar áhuga hennar á skráningu náttúrunnar og vísindalegum vinnuaðferðum sem hluta af djúpstæðri löngun mannsins til að skilja og skilgreina náttúruna. 

Þessi ljósmynd er hluti af myndaröðinni Vopn byltingarinnar. Hún sýnir búsáhöld á hvítum bakgrunni. Slíkt er alvanalegt í kyrralífsverkum. Það er ekkert merkilegt við þessa potta og pönnur, skeiðar og ausur, nema hvað allir þessir hlutir eru beyglaðir. Þetta eru vopn búsáhaldabyltingarinnar. Þau hafa fellt ríkisstjórn og eru nú stöðug áminning hverri nýrri stjórn um að missa ekki sjónar á yfirlætislausum, efnislegum grundvelli lífsins.

Collection