Ásmundur Sveinsson

Erró

Gabríela Friðriksdóttir (f. 1971) útskrifaðist frá skúlptúrdeild Myndlista- og handíðaskóla Íslands árið 1997 og stundaði nám í AVU akademíuna í Prag, veturinn 1998. Hún vinnur jöfnum höndum með teikningar, málverk, skúlptúr, innsetningar og myndbandsverk. Verk Gabríelu eru oft á mörkum raunveruleika og ímyndunar eða á mörkum hins óhlutbundna og hins hlutbundna og vinnur hún gjarnan útfrá ýmsum andlegum kerfum, fornum og nýjum.  Í verkum hennar er samstarf á milli hinna ýmsu listgreina einkennandi og hún vinnur gjarnan stærri verk sín og innsetningar með tónlistarmönnum, dönsurum, kvikmyndagerðamönnum og arkitektum. 

Gabríela var fulltrúi Íslands á Feneyjatvíæringnum árið 2005 og var verk þetta hluti af viðamikilli innsetningu ásamt skúlptúrum, teikningum og málverkum. Hér eru vídeóin fjögur sýnd, eitt fyrir hverja höfuðátt, hvert á fætur öðru. Þar gerir listamaðurinn tilraun til þess að finna hugsunum og hugarburði farveg innan heildstæðs sagnaheims þar sem stuðst er við gamalgróna frásagnartækni, goðsögur og sammannleg minni. Vídeóin vann Gabríela í samvinnu við Björk Guðmundsdóttur, Daníel Ágúst Haraldsson, Ernu Ómarsdóttur og Sigurð Guðjónsson. Hún fékk einnig til liðs við sig þau Björk, Daníel Ágúst, Borgar Þór Magnason og Jónas Sen að semja tónverk út frá píanóstefi sem hún spann.

Í myndbandsverkinu er vera skorin upp og svart slím fjarlægt úr henni. Á miðöldum trúðu menn því að líkaminn framleiddi svart gall sem réði andlegri heilsu og mátti það ekki fyrirfinnast í of miklum mæli. Á forngrísku mynda orðin „svart“ og „gall“ [melancholia] bókstaflega hugtakið þunglyndi. 

Gabríela hefur sótt innblástur á ýmsum vettvangi í tilraunum sínum til þess að fjalla um tilfinningar, líðan og allt það sem bærist innra með manninum. Einkum hefur hún skoðað hugmyndakerfi frá fyrri tíð, dulhyggju og forneskju. Hún hefur miðlað niðurstöðum sínum í teikningu, málverki, skúlptúr og myndbandsverkum. Þar koma fram karakterar, táknmyndir og efni sem bera með sér marglega eiginleika og endurspegla völundarhús mannlegrar tilveru.  

Collection

Work