Hér leikur listamaðurinn með hugmyndina um málverk, sem þetta er á ákveðinn hátt. Þetta er strigi sem límdur er saman í pokaform og síðan málaður. Órætt innihaldið belgir hann síðan út og gefur honum form, eins og blindrammi spennir strigaflöt. Baldur hefur gert fleiri verk sem eru einhvers konar ílát, vasar, tunnur og kassar, allt handunnið frá grunni en í verkunum hans er aldrei gerð grein fyrir innihaldinu.

Ruggustóll Baldurs er búinn til úr sama efniviði og málverk, máluðum striga og rammaefni. Hann er í raun þrívítt málverk komið úr á mitt gólf. En ruggustóllinn er fastur í kyrrstöðu, hann getur ekki ruggað fram og tilbaka. Eins og mynd í málverki stendur tíminn í verkinu kyrr.  

Baldur Geir Bragason (f.1976) útskrifaðist með BA gráðu í myndlist árið 2001 og fór svo í framhaldsnám í Berlín undir handleiðslu Karin Sander. Með verkum sínum veltir hann gjarnan upp spurningum um tilveru hlutanna og setur fram einfalda hluti eða táknmyndir en með efnisvalinu vísa hlutirnir í sjálfa sig á sama tíma og finna má í þeim listsögulegar skírskotanir.

Collection

Work