Innrás III: Matthías Rúnar Sigurðsson

Innrás III: Matthías Rúnar Sigurðsson

Innrás III: Matthías Rúnar Sigurðsson

Ásmundarsafn

-

Matthías Rúnar Sigurðsson vinnur meðal annars höggmyndir í stein. Klassísk handverksnotkun hans kallast skemmtilega á við verk Ásmundar og er fróðlegt að sjá ungan og upprennandi myndhöggvara sýna verk sín í samhengi Ásmundarsafns. 

Matthías Rúnar Sigurðsson (f. 1988) er þriðji af fjórum listamönnum til að taka þátt í sýningar röðinni Innrás í Ásmundarsafni, þar er núlifandi listamönnum boðið að kallast á við verk Ásmundar Sveinssonar.

Hann útskrifaðist frá myndlistardeild Listaháskóla Íslands árið 2013 og hefur síðan þá verið ötull í sýningarhaldi og tekið þátt í grasrótarstarfi. Má þar nefna sýningar í Ekkisens, Gallery Port, Safnasafninu og einkasýningu í SÍM salnum. Sígild nálgun hans kallast á við handverk Ásmundar Sveinssonar á skemmtilegan og áhugaverðan hátt.

Matthías er myndhöggvari í orðsins fyllstu merkingu. Verkin hér á sýningunni hefur hann hoggið í grágrýti, granít og gabbró. Úr grjótinu sprettur líf, kynjaverur sem taka á sig margskonar form, menn, dýr og óræðir karakterar.

Verkum sínum stillir hann meðal annars upp á yfirlitssýningunni List fyrir fólkið þannig að þau standa með verkum sem Ásmundur vann á sama æviskeiði. Þar er þá að sjá verk tveggja ungra myndhöggvara sem eiga framtíðina fyrir sér. Matthías vann framan af ferli sínum mest með teikningu og prent en síðustu árin hefur hann notað hamar og meitil við vinnu sína. Eins og með teikningar hans þá bera höggmyndirnar sterk höfundareinkenni Matthíasar Rúnars þar sem hann beislar sköpunarkraftinn og vinnugleðina.

Árið 2018 eru fyrirhugaðar fjórar innrásir inn í sýninguna List fyrir fólkið, þar sem völdum verkum Ásmundar Sveinssonar er skipt út fyrir verk starfandi listamanna. Fjórum listamönnum hefur verið boðið að setja upp verk sín á sýningunni í einkasamtali við verk Ásmundar. Það eru Guðmundur Thoroddsen, Hrafnhildur Arnardóttir a.k.a. Shoplifter, Margrét Helga Sesseljudóttir og Matthías Rúnar Sigurðsson. Öll vinna þau skúlptúra í ólík efni og veita verk þeirra áhugaverða sýn á þróun þrívíðrar myndlistar, efnisval og viðfangsefni..

Myndir af sýningu

Myndir frá opnun

Ítarefni

Sýningarstjóri/-ar

Sigurður Trausti Traustason

Umfjöllun fjölmiðla

Boðskort