Ásmundur Sveinsson

Erró

Verkið er staðsett í Hallsteinsgarði í Grafarvogi.Verkaröð Hallsteins, Veðrahöll, er safn sjálfstæðra verka sem öll eru samsett úr plötuáli. Þau bera sterk höfundareinkenni, leik með óhlutbundin form þar sem röðun, hleðsla, endurtekning og tenging skapar spennu. Líkt og í öðrum verkum sínum byggir Hallsteinn á módernískri arfleifð þar sem verkin tala fyrir sig án sérstakrar tengingar við nokkuð annað. „Listin fyrir listina“. Heiti þessara verka gefur þó til kynna tengingu við náttúruna og þau njóta sín vel í Hallsteinsgarði í Grafarvogi. 

Verkið er staðsett í Hallsteinsgarði í Grafarvogi.Tvö verk úr verkaröð Hallsteins, Ris, frá níunda áratuginum, er að finna í Hallsteinsgarði í Grafarvogi. Listaverkið Ris I er tignarlegur málmskúlptúr með þremur öngum. Tveir þeirra teygja sig til himins en sá þriðji bognar líkt og krepptur þumall. Ris I var unnið árið 1981 en Ris V tveimur árum síðar. Bæði sýna fremur einföld form sem hafa þó verið bjöguð með þeim hætti að mikil spenna myndast í þeim. Það er engu líkara en þunglamalegir stálskúlptúrarnir séu að reisa sig eða teygja sig upp til himins. Þessi hreyfing í stöðugu efni og grunnformum er viðfangsefni fjölmargra verka listamannsins.   

Verkið er staðsett í Hallsteinsgarði í Grafarvogi.Hallsteinn hefur unnið tvö verk með löngu millibili en tengir þau með sama heiti, Harpan I frá 1972, og Harpan II frá 2006. Bæði eru verkin óhlutbundin en minna þó á hljóðfæri þar sem þau byggjast á þríhyrningsforminu eins og harpan. Eins og oft má sjá í verkum Hallsteins hverfast þau bæði um efnið sjálft og form þess en ekki síður loftið sem umlykur þau og þau form sem teikna sig upp inn á milli. Verkin eru úr steyptu stáli og rísa tignarlega í Hallsteinsgarði í Grafarvogi þar sem vindar leika tónverk á hörpu listamannsins. 

Verkið er staðsett í Hallsteinsgarði í Grafarvogi.Steinbarn II er að mörgu leyti einkennandi fyrir höggmyndir Hallsteins, opin fyrir miðju og formin einföld en hér með þungann nær stöpli verksins. Verkið er gert úr steyptu stáli og stendur við svonefndan Hallsteinsgarð í Grafarvogi við Gufunes. Þar njóta verk hans sín vel í samspili við náttúruna og landslagið. Þaðan er útsýni vítt og breitt, allra veðra er von og sjávarborðið rís og fellur. 

Verkið er staðsett í Hallsteinsgarði í Grafarvogi.Hyrningar er heiti nokkurra verka eftir Hallstein sem standa á nokkrum stöðum í borginni, þ.á m. í Hallsteinsgarði í Grafarvogi. Eitt er varðveitt innanhúss þar sem því er ekki ætlað að standa utandyra. Öll tilheyra þau sömu verkaröð þar sem í grunninn byggja þau á áþekkum formum. Hins vegar eru þau útfærð í ólík efni, stein, málað eða ómálað stál. Léttleika, leik og frjóa myndhugsun er að finna í verkunum og er innra rými þeirra opið, afmarkað með einföldum en skýrum ramma.

Verkið er staðsett í Hallsteinsgarði í Grafarvogi.Maður og kona I (1968) byggist á stílfærðum samruna tveggja manneskja þar sem karlhlutinn er stærri og sterklegri og umlykur kvenhlutann á verndandi hátt. Ef horft væri á þessa hluta hvorn í sínu lagi væri erfitt að greina í þeim mannsmyndir, en samspil þeirra gæðir þá meiningu og lífi. Frummynd verksins er frá 1968 en var stækkuð árið 1984. Hallsteinn gaf Reykjavíkurborg höggmyndirnar sínar sem standa í Hallsteinsgarði í Gufunesi árið 2012. Maður og kona I er með elstu verkum í garðinum.

Hér leikur listamaðurinn með hugmyndina um málverk, sem þetta er á ákveðinn hátt. Þetta er strigi sem límdur er saman í pokaform og síðan málaður. Órætt innihaldið belgir hann síðan út og gefur honum form, eins og blindrammi spennir strigaflöt. Baldur hefur gert fleiri verk sem eru einhvers konar ílát, vasar, tunnur og kassar, allt handunnið frá grunni en í verkunum hans er aldrei gerð grein fyrir innihaldinu.

Baldur Geir Bragason (f.1976) útskrifaðist með BA gráðu í myndlist árið 2001 og fór svo í framhaldsnám í Berlín undir handleiðslu Karin Sander. Með verkum sínum veltir hann gjarnan upp spurningum um tilveru hlutanna og setur fram einfalda hluti eða táknmyndir en með efnisvalinu vísa hlutirnir í sjálfa sig á sama tíma og finna má í þeim listsögulegar skírskotanir.

Ruggustóll Baldurs er búinn til úr sama efniviði og málverk, máluðum striga og rammaefni. Hann er í raun þrívítt málverk komið úr á mitt gólf. En ruggustóllinn er fastur í kyrrstöðu, hann getur ekki ruggað fram og tilbaka. Eins og mynd í málverki stendur tíminn í verkinu kyrr.  

Þetta verk er hluti af seríu sem samanstendur af 32 ljósmyndum. Á árunum 2001-2006 gerðu Bryndís Snæbjörnsdóttir og Mark Wilson rannsókn á uppstoppuðum ísbjörnum í Bretlandi. Markmiðið var að hafa þar uppi á öllum uppstoppuðum ísbjörnum, kanna sögu hvers og eins og afla upplýsinga eins og staðsetningu, tíma og einstaklinga sem tengjast dauða þeirra eða veiði. Þau sóttu um leyfi til að ljósmynda birnina en þá var að finna t.d. í söfnum, geymslum, einkaheimilum, jafnvel ruslahaugum. Listamennirnir vilja skoða hvers konar hugmyndir borgarbúar hafa um náttúruna og til þess skoða þau ýmis tengsl þeirra við dýr.

Collection