Ásmundur Sveinsson

Erró

Kjarval

Verkið er staðsett við Rauðavatn.Verkið var sett upp í tilefni af sýningunni „Landlist við Rauðavatn“ árið 2000. Þetta var samstarfsverkefni Vinnuskóla Reykjavíkur og Reykjavíkur - menningarborgar Evrópu árið 2000. Hugmyndina að verkefninu átti Guðrún Erla Geirsdóttir, formaður stjórnar Vinnuskóla Reykjavíkur. Norðurljósasætið gerði Erla með hjálp unglinga í Vinnuskólanum en verkið er hlaðinn stigi sem stendur í norður-suður segulátt, en segulkraftar jarðar hafa afgerandi áhrif á birtingu norðurljósanna. Listakonan flísalagði tröppurnar með mósaíkflísum. Hún sagði á þeim tíma sem verkið var reist: „Verkið stendur þar sem ekkert rafmagn er, þannig að norðurljósin sjást hérna. Ég vildi gera verk sem vísar til norðurljósanna, þar sem þau eru mjög sérstakt fyrirbrigði og einstakt að þau skuli sjást hér í borginni.“

Erla Þórarinsdóttir fæddist í Reykjavík árið 1955. Hún ólst upp í Svíþjóð og lærði í Konstfack íStokkhólmi og Rietveld Akademie í Amsterdam árin 1976-81. Um miðjan níunda áratuginn bjó hún í New York borg í Bandaríkjunum áður en hún sneri að lokum aftur heim til Íslands þar sem hún settist að. Erla vinnur með rými, tíma og efnisferla í verkum sínum þar sem minni, mannlegt samhengi og mælikvarðar renna saman. Í sumum málverkum sínum hefur hún notað blaðsilfur og ljósnæm efni sem breytast er þau komast í snertingu við ljós eða súrefni. Þar með endurspegla verkin það umhverfi sem þau hanga í. Erla hefur haldið fjölda einkasýninga og tekið þátt í samsýningum á Íslandi, í Skandinavíu, Evrópu, Bandaríkjunum, Indlandi og Kína.

Í verkinu Kort VII er litsterkum hringjum raðað á agaðan hátt um djúpbláan strigann, en sterk form, afgerandi litir og áferð einkenna oft málverk Erlu. Í hugum margra kunna kort að vísa til landfræðilegra afstöðumynda eins og landakorta eða jafnvel stjörnukorta en listamaðurinn hugsar þetta kort frekar sem yfirlit yfir tilveru manna. Eftir ótalmargar ferðir milli staða, hlutlægra og huglægra, á lífsleið okkar gleymir fólk gjarnan leiðinni en áfangastaðir og fastir punktar tilverunnar verða eftir.

Collection

Work