12. júlí 2015 - 16:00

Listamannaspjall um Mynd // Hlutur

Samsett mynd
Staður viðburðar: 
Hafnarhús

 Á sunnudaginn 12. júlí kl. 16 verða þær Áslaug Íris Katrín Friðjónsdóttir og Guðlaug Mía Eyþórsdóttir með listamannaspjall um sýningu sína Mynd // Hlutur. En þetta er þriðja sýningin í sumarsýningarröð Kunstschlager í D-sal Hafnarhússins þar sem hver meðlimur Kunstschlager fær með sér valda myndlistarmenn.

Fagurfræði Áslaugar og Guðlaugar er ólík en báðar vinna þær með myndbyggingu og form í verkum sínum. Áslaug notast við dempaða liti, hrá efni eins og steypu, gifs og við sem hún teflir saman í teikningu og málverk og skapar ákveðna svörun við myndbyggingu verkanna. Guðlaug Mía notar sterka litir og afgerandi form í verkum sínum þar sem hún leikur sér að skynvillum áhorfandans og þenur þannig út víddir miðilsins.

Áslaug Íris Katrín Friðjónsdóttir (f. 1981) útskrifaðist frá Listaháskóla Íslands árið 2006 og lauk síðar mastersnámi frá School of Visual Arts í New York árið 2009. Áslaug hefur tekið þátt í samsýningum hér heima og erlendis og hélt sína fyrstu einkasýningu í Hverfisgallerí í mars 2015.

Guðlaug Mía Eyþórsdóttir (f. 1988) útskrifaðist frá Listaháskóla Íslands árið 2012. Hún stofanaði og rak Kunstschlager ásamt fleirum auk þess sem hún stóð að útgáfunni Gamli Sfinxinn sem gefur út myndlistartengt efni af ýmsum toga. Guðlaug Mía hefur tekið þátt í fjölmörgum sýningum bæði hér heima og erlendis. 

 

Sýning: 
Frítt fyrir handhafa Árskorts Listasafns Reykjavíkur og Menningarkorts Reykjavíkur