19. júní 2021 - 13:00

Leiðsögn um Perlufesti á Kvenréttindadaginn

Leiðsögn um Perlufesti á Kvenréttindadaginn
Staður viðburðar: 
Hljómskálagarðurinn

Edda Halldórsdóttir, verkefnastjóri skráninga og Sigurður Trausti Traustason deildarstjóri safneignar leiða gesti um útilistaverkin í Perlufestinni á Kvenréttindadaginn. 

Skráning er nauðsynleg HÉR.

Kvenréttindadagurinn er hátíðis- og baráttudagur kvenna á Íslandi þar sem því er fagnað að 19. júní 1915 fengu konur á Íslandi, 40 ára og eldri, kosningarétt og kjörgengi til Alþingis.

Höggmyndagarðurinn Perlufesti var opnaður þann 19. júní 2014 en hann er til minningar um upphafskonur íslenskrar höggmyndalistar. Hann er staðsettur í suðvesturhorni Hljómskálagarðsins.

Garðurinn hlaut nafnið Perlufesti að tillögu Gjörningaklúbbsins. Nafnið vísar til hringlaga afstöðu verkanna til hvers annars í garðinum, en undirstrikar einnig að listakonurnar og verk þeirra eru sérstök hvert fyrir sig, líkt og perlur sem hafa verið þræddar upp á þráð.

Í Perlufestinni eru höggmyndir eftir sex konur sem voru frumkvöðlar í höggmyndalist hér á landi, þær Gunnfríði Jónsdóttur (1889–1968), Nínu Sæmundsson (1892-1962), Tove Ólafsson (1909-1992), Þorbjörgu Pálsdóttur (1919-2009), Ólöfu Pálsdóttur (1920) og Gerði Helgadóttur (1928-1975). Verkin sem um ræðir eru: Landnámskonan eftir Gunnfríði, Hafmeyjan eftir Nínu, Maður og kona eftir Tove, Piltur og stúlka eftir Þorbjörgu, Sonur eftir Ólöfu og Skúlptúr eftir Gerði. Einnig er tímabundið verk Rögnu Róbertsdóttur (1945) nú í Perlufestinni sem kallast Stígur og er gert úr Rauðamöl frá Seyðishólum.

Garðurinn er minnisvarði um það mikilvæga frumherjastarf sem konurnar unnu á tímum þegar lítill skilningur var á að þær legðu fyrir sig listsköpun. Höggmyndagarður í miðborg Reykjavíkur undirstrikar stöðu listkvennanna sem formæðra sameiginlegrar listhefðar allra landsmanna.