9. febrúar 2020 - 14:00

Get ekki teiknað bláklukku: Eggert Pétursson

Skissubók Eggerts Péturssonar
Staður viðburðar: 
Kjarvalsstaðir

Eggert Pétursson, listmálari og sýningarstjóri, verður með leiðsögn um sýninguna Jóhannes S. Kjarval: Get ekki teiknað bláklukku.

Listamaðurinn Eggert Pétursson (f. 1956) hefur sett saman sýningu á blómaverkum Jóhannesar S. Kjarvals. Þegar hann tók verkefnið að sér fyrir Listasafn Reykjavíkur ákvað Eggert að rannsaka blómaþáttinn í verkum Kjarvals og taka verkefnið listrænum tökum.

Eggert segir um blómaverk Kjarvals að þau séu yfirgripsmeiri heldur en verk hans sjálfs, að Kjarval fari út um víðan völl. Hann einskorði sig ekki við grasafræði heldur máli hann og teikni þau blóm sem eru í kringum hann, hvort sem það eru skrautblóm, pottaplöntur eða villt blóm, en ekki síst máli hann flóru hugans. Eggert ákvað að flokka verkin eftir efnisþáttum og myndrænum skyldleika og sýna þau eins og um sín eigin verk væri að ræða.  Val hans á verkunum er fremur hugsað til að mynda heillega sýningu en að sýna sögulegt yfirlit blómaverka Kjarvals.

Í aðdraganda sýningarinnar nálgaðist Eggert verkefnið á mjög myndrænan og listrænan hátt og varð sköpunarferlið nánast að listaverki í sjálfu sér. Eggert mun fara yfir sköpunarferlið í leiðsögninni ásamt því að skissubókin sem varð til í undirbúningnum verður til sýnis.

Nú fer hver að verða síðastur að sjá sýninguna Jóhannes S. Kjarval: Get ekki teiknað bláklukkur en henni lýkur sunnudaginn 16. febrúar.

Aðgöngumiði á safnið gildir.

Frítt fyrir handhafa Árskorts Listasafns Reykjavíkur og Menningarkorts Reykjavíkur