1. janúar 2022 - 0:00 til 5. janúar 2022 - 0:00

Auglýsingahlé Billboard: Hrafnkell Sigurðsson

Auglýsingahlé Billboard: Hrafnkell Sigurðsson
Staður viðburðar: 
350 skjáir um alla borg

Myndlistarmaðurinn Hrafnkell Sigurðsson hefur verið valinn til þess að sýna nýtt verk sitt Upplausn á 350 skjám Billboard um alla borg í byrjun næsta árs.

Billboard, sem rekur auglýsingaskjái í strætóskýlum og við gatnamót í Reykjavík, efndi til opinnar samkeppni um myndlistarverk í almannarými í samstarfi við Y gallery og Listasafn Reykjavíkur. Yfir tímabilið 1.–5. janúar 2022 verður Auglýsingahlé á yfir 350 skjáum Billboard um alla Reykjavíkurborg. Þessi tími verður helgaður sýningu á verkinu Upplausn eftir Hrafnkel Sigurðsson en hann var valinn úr hópi 50 umsækjenda.

Listamaðurinn fær 1.000.000 kr greiddar fyrir verkið sem verður að sýningartíma loknum gefið í safneign Listasafns Reykjavíkur. Jafnframt er stefnt að því að verkið verði áfram sýnilegt í almenningsrými í borginni að loknu sýningartímabilinu.

Verkið verður sýnt á yfir 350 skjáum um alla borgina, bæði skjáum í strætóskýlum og stórum skjáum við fjölfarnar götur.

Dómnefndin var skipuð fulltrúa frá Y gallery, Listasafni Reykjavíkur, Billboard og SÍM. 

Verkefninu er ætlað að lýsa upp skammdegið og gefa fólki tækifæri á að njóta listar um alla borg.