D38 Ragn­heiður Kára­dóttir: míní-míní múltíversa

Ragnheiður Káradóttir_míní-míní múltíversa

D38 Ragnheiður Káradóttir: míní-míní múltíversa

Hafnarhús

-

Á sýningunni míní-míní múltíversa kannar listamaðurinn Ragnheiður Káradóttir mörkin á milli hins manngerða og hins náttúrulega. Sérstaklega lítur hún til staða sem hannaðir hafa verið til afþreyingar, líkt og mínígolfvalla, lystigarða, íþróttaleikvanga og skemmtigarða. Með innsetningu sinni kallar Ragnheiður fram eins konar rof í veruleika áhorfenda með innsýn í ímyndaða hliðarvídd sem kallast á við það umhverfi sem við þekkjum.

Skúlptúrar sýningarinnar koma sumir hverjir kunnuglega fyrir sjónir enda fundnir hlutir sem settir eru í nýjan búning, og í samhengi við keramik-skúlptúra sem Ragnheiður mótar verða til framandi hlutir sem vísa í ólíkar áttir.

Í sköpunarferlinu sér listamaðurinn útkomuna yfirleitt ekki fyrir og til verður samtal á milli óræðra skúlptúra. Blásið er lífi í dauða hluti og þeir persónugerðir ásamt því að nytjahlutir fá annan tilgang. Sýningin er full af leik og býður áhorfendum að móta sínar eigin sögur, tengingar og skilning á verkinu. 

Ragnheiður Káradóttir (f. 1984) útskrifaðist með BA gráðu í myndlist frá Listaháskóla Íslands árið 2010 og lauk meistaranámi í myndlist vorið 2016 frá School of Visual Arts í New York. Ragnheiður hefur tekið þátt í fjölda sýninga bæði hér á landi sem og erlendis og er annar helmingur listatvíeykisins Lounge Corp., sem miðar að því að sýna myndlist í óhefðbundnum rýmum.

Sýningaröðin í D-sal hóf göngu sína árið 2007. Hér er listamönnum sem hafa mótandi áhrif á íslenska myndlistarsenu boðið að halda sína fyrstu einkasýningu í opinberu safni..

Myndir af sýningu

Myndir frá opnun

Ítarefni

Sýningarstjóri/-ar

Aldís Snorradóttir

Boðskort