Sýningaropnun: Spor og þræðir

James Merry, Nike / Jöklasóley, 2015.

Sýningin Spor og þræðir verður opnuð fimmtudaginn 9. júní kl. 20.00 í Listasafni Reykjavíkur – Kjarvalsstöðum. Ólöf Kristín Sigurðardóttir, safnstjóri Listasafns Reykjavíkur, og Vigdís Jakobsdóttir, listrænn stjórnandi Listahátíðar í Reykjavík, opna sýninguna.

Spor og þræðir er sýning á verkum 14 íslenskra samtímalistamanna sem sauma út eða nýta nál og þráð sem verkfæri við listsköpun sína. Þau líta ýmist til fortíðar og vinna með arfleifð handverks og hefðar, eða nýta nálina til þess að prófa sig áfram í framsæknum tilraunum í bland við aðra miðla. Á sýningunni eru ný og nýleg verk eftir fjölbreyttan hóp listamanna, bæði fulltrúa yngri kynslóðarinnar sem og reyndari listamenn sem þegar hafa sett mark sitt á íslenska myndlistarsenu. Þau eiga það öll sameiginlegt að hafa tekið ástfóstri við nálina sem verkfæri sem skipar veigamikinn þátt í listsköpun þeirra. Verkin endurspegla mikla breidd í inntaki, þar sem glímt er við djúpstæð samfélagsmein samhliða ljóðrænu hversdagsins og ljúfsárri nostalgíu.

Saumnálin hefur alla tíð verið vinsælt tól til listsköpunar og listskreytinga. Hún hefur einkum verið í höndum kvenna sem hafa lagt rækt við að viðhalda gömlum hefðum í handverki sem og þróað nýjar og skapandi leiðir til úrvinnslu með nál og þráð. Útsaumur var ásamt útskurði langalgengasti miðill listamanna á Íslandi fram að 20. öld. Þá vék hann tímabundið fyrir annarri tækni en gekk í endurnýjun lífdaga sem hluti af kvenréttindabaráttu 8. áratugarins og þróun femínískrar myndlistar. Í dag sjáum við enn fjölbreyttari merki um endurkomu útsaums inn á vettvang myndlistar, ekki bara hér á landi, heldur í alþjóðlegri samtímalist. Hvað veldur þessum aukna áhuga og sýnileika? Hvað knýr samtímalistamenn til þess að taka sér nál í hönd við gerð verka sinna?

Listamenn
Agnes Ársælsdóttir
Anna Líndal
Anna Andrea Winther
Eirún Sigurðardóttir
Erla Þórarinsdóttir
Guðrún Bergsdóttir
G.Erla – Guðrún Erla Geirsdóttir
Guðný Rósa Ingimarsdóttir
James Merry
Kristinn G. Harðarson
Kristín Gunnlaugsdóttir
Loji Höskuldsson
Petra Hjartardóttir
Rósa Sigrún Jónsdóttir

Sýningarstjórar
Birkir Karlsson og Ingunn Fjóla Ingþórsdóttir

Sýningin endurspeglar vaxandi áhuga á handverki, en á undanförnum árum hefur orðið algengara að listamenn víða um heim noti þessa hefðbundnu aðferð handverksins til að skapa fjölbreytt og spennandi listaverk. 

Sýningin er hluti af Listahátíð í Reykjavík og stendur til 18. september 2022.