14. nóvember 2015 -
15:00 til 17:00

Málstofa: Kvennatími – Hér og nú þrjátíu árum síðar

G.ERLA (Guðrún Erla Geirsdóttir), Brynhildur Þorgeirsdóttir, Harpa Björnsdóttir og Erla Þórarinsdóttir
Staður viðburðar: 
Kjarvalsstaðir

Efnt verður til málstofu á Kjarvalsstöðum laugardaginn 14. nóvember kl. 15  í tilefni sýningarinnar Kvennatími – Hér og nú þrjátíu árum síðar sem þar stendur yfir. Í pallborði verða þrír listamenn sýningarinnar, þær Brynhildur Þorgeirsdóttir, Erla Þórarinsdóttir og Harpa Björnsdóttir, ásamt G.ERLU (Guðrún Erlu Geirsdóttur) sem var í sýningarnefnd Hér og nú á Kjarvalstöðum 1985 og gegndi jafnframt stöðu framkvæmdastjóra Listahátíðar kvenna sama ár. Anna Jóa sýningarstjóri Kvennatíma leiðir umræður.

Hugmyndin að baki sýningunni Kvennatími – Hér og nú þrjátíu árum síðar var að kalla aftur saman þær konur sem sýndu saman undir heitinu Hér og nú á Kjarvalsstöðum haustið 1985. Við undirbúning nýju sýningarinnar vöknuðu spurningar á borð við þá hvort kyn listamannanna hefði með einhverjum hætti mótað feril þeirra og verið í þeim skilningi kvennatími. Hvers vegna er ennþá þörf á sérstökum „kvennasýningum“? Á málstofunni miðla pallborðsþátttakendur af drjúgri reynslu sinni. Þess má geta að árið 1994 gerðu sömu konur úttekt á kynjaslagsíðunni í íslenskum listheimi í tengslum við sýningu á plakötum Guerilla Girls í Nýlistasafninu. Ýmislegt hefur áunnist síðan en ljóst er að enn er langt í land hvað snertir jafnræði kynjanna í listheiminum.

Sýningin Hér og nú var einn umfangsmesti viðburður Listahátíðar kvenna 1985, en efnt var til hennar vegna loka kvennaáratugar Sameinuðu þjóðanna. Tilgangur hátíðarinnar var að gera framlag kvenna á sviði lista- og menningar sýnilegt. Tilefni nýju sýningarinnar er einnig hátíð sem tengist konum því að á þessu ári er haldið upp á 100 ára afmæli kosningaréttar kvenna hér á landi. Sýningin stendur til 29. nóvember 2015. Sýningarstjóri er Anna Jóa, myndlistarmaður og listfræðingur.

Frítt fyrir handhafa Árskorts Listasafns Reykjavíkur og Menningarkorts Reykjavíkur