Kvikmyndasýningar: Tak i lige måde: Samtímalist frá Danmörku | listasafnreykjavikur.is
17. maí 2018 - 19:45

Kvikmyndasýningar: Tak i lige måde: Samtímalist frá Danmörku

Staður viðburðar: 
Hafnarhús

Í tengslum við sýninguna Tak i lige måde: Samtímalist frá Danmörku sem nú stendur yfir í Hafnarhúsi býður Listasafn Reykjavíkur upp á dagskrá sem kallast á við efni sýningarinnar. 
Þar eru verk fjögurra listamanna sem fjalla hver með sínum hætti um nýlendustefnu, fólksflutninga, þjóðarsjálfsmynd og landamæri. 

Fimmtudaginn 17. maí verða sýndar tvær heimildarmyndir í Hafnarhúsinu. Sumé - the Sound of a Revolution kl. 19.30 og We Carry It Within Us – fragments of a shared colonial past kl. 20.45. 

Sýningin og dagskráin eru hluti af aldarafmælishátíð fullveldis Íslands. ​

Sumé – the Sound of a Revolution eftir Inuk Silis Høegh er heimildarmynd frá 2014 sem fjallar um Grænlensku rokkhljómsveitina Sumé sem starfaði um og eftir 1970.

Hljómsveitin var virkur þátttakandi í fyrstu bylgju mótstöðu gegn dönsku nýlendustjórninni.
Á árunum 1973 til 1976 gaf hljómsveitin út þrjár breiðskífur sem höfðu áhrif á sögu Grænlands með hápólitískum textum.
Sumé var fyrst til að hljóðrita texta á grænlensku og fyrir þessar útgáfur átti grænlensk tunga ekki orð yfir ,,byltingu” eða ,,kúgun”.
Eftir 250 ára undir danskri stjórn ýtti Sumeéundir endurskoðun og endurnýjun á grænlenskri menningu og sjálfsmynd og vísaði þannig veginn í átt til fullveldis.

Sumé – the Sound of a Revolution er fyrsta kvikmynd sem gerð hefur verið um samtímamenningu landsins og fyrsta heimildamynd í fullri lengd sem framleidd er á Grænlandi.

We Carry It Within Us – fragments of a shared colonial past er heimildarmynd eftir Helle Stenum frá árinu 2017 sem bregður rannsakandi ljósi á nýlendustefnu Danmerkur. Myndin veitir skarpa innsýn í sögu Danmerkur sem nýlenduþjóðar. Á árinu 2017 var öld síðan Danmörk seldi Jómfrúareyjarnar til Bandaríkanna.

Í myndinni heyrum við og sjáum söguna sagða í gegnum minningar og reynslu afkomenda hina dönsku nýlenda í Vestuindíum og Afríku. 
Listamaður, nemandi, rithöfundur og mannfræðingur, ásamt menningarfræðingum segja frá hlutverki Danmerkur og Evrópu í undirokun og þrælaviðskiptum yfir Atlantshafið.
Fjallað er um hvernig þessi saga birtist í samtímanum á söfnum, í listum, menntun og efnahag, bæði sem minningar og líka sem gleymska. 67 mín.

Aðgöngumiði á safnið gildir.

Frítt fyrir handhafa Árskorts Listasafns Reykjavíkur og Menningarkorts Reykjavíkur