Mót Hönnun á Íslandi - Íslenskir hönnuðir

Kjarvalsstaðir

-

Á sýningunni á Kjarvalsstöðum verður skyggnst inn í hönnun 21. aldarinnar auk þess sem íslensk hönnun á síðustu öld verður skoðuð. Yfir 120 hlutir verða til sýnis eftir fjölmarga hönnuði og verður þar ýmislegt forvitnilegt að finna. Sýningarformið verður nýstárlegt og þarf sýningargesturinn sjálfur að raða saman og geta í eyðurnar.

Markmið hönnuða með sýningunni er að efla faglega umræðu um hönnun, auka meðvitund fólks um hönnun og hönnunarsögu og vekja athygli á efnahagslegu mikilvægi hönnunar fyrir íslenskt atvinnulíf. Sú ánægjulega þróun á sér stað að kennsla í hönnunargreinum hér á landi er að aukast og á eftir að renna sterkari stoðum undir íslenska hönnun.

Sýningin er byggð á þremur meginhugmyndum, hönnuðinum sem einstaklingi, iðnaðarframleiðandanum og sögulegum arfi íslenskrar hönnunar.

Íslensk nútíma hönnun skipar veglegan sess á sýningunni með megináherslu á hönnun sem byggir á hugmyndafræðilegum nýjungum. Hlutir og framleiðsla verða sýnd í alþjóðlegu ljósi. Sýningarformið sýnir óljós skil tíma og rýmis, feril hugmynda og ferðalög þeirra og vekur forvitni áhorfandans..