Sýningaropnun − Helgi Gíslason: Þar sem mörkin liggja

Sýningaropnun − Helgi Gíslason: Þar sem mörkin liggja. Ljósmynd: ©Leo Roos

Sýning á verkum Helga Gíslasonar í Ásmundarsafni, Þar sem mörkin liggja, opnar laugardaginn 31. ágúst kl. 16.00 í Listasafni Reykjavíkur – Ásmundarsafni við Sigtún. Sýningin er sú fjórða í röð einkasýninga fimm listamanna sem eiga það sameiginlegt að hafa skapað áberandi útilistaverk í borginni.

Helgi Gíslason myndhöggvari á allmörg listaverk í almannarými, bæði í Reykjavík, hér og þar um um landið og erlendis. Á sýningunni í Ásmundarsafni eru verk eftir Hegla sem kallast á við útilistaverk hans í gegnum tíðina. Helgi hefur á löngum ferli unnið verk sín í margskonar efni, dregið fram eiginleika hvers um sig og fengið til að lúta vilja sínum. Málmur, tré, gler, gifs og textíll leika í höndum hans. Verkin eru formföst en túlkun þeirra er fljótandi, lifandi og opin. Þar er tíminn meitill sem breytir túlkun verkanna og hver kynslóð gengur að þeim sem óskrifuðu blaði.

Helgi fæst í verkum sínum við manneskjuna og tilvist hennar. Efnisval og formgerð leggur grunn að hughrifum og túlkun sem endurspeglar tilfinningaskalann. Helgi vinnur abstrakt verk og hálf fígúratíf verk sem eru hrein abstrakt fyrir honum. Í listinni leitar hann að því hvar mörkin liggja. Bæði hans mörk sem listamanns en einnig verkanna.

Opinber verk Helga skiptast í pöntuð verk og minnisvarða annars vegar og hins vegar þau sem spretta að öllu leyti upp úr hans hugarheimi. Útilistaverkin og önnur listsköpun hans eru nátengd, allt er á einhvern hátt afleiðing þess sem á undan er komið og vex úr þeim hugmyndaheimi sem Helgi er að vinna í hverju sinni.
 
Útilistaverk Helga er m.a. að finna á eftirfarandi stöðum: Memorial for Fishermen, 1988, Höfn. Scienta sol mentis, 2005, stendur við Fjölbrautaskólann í Breiðholti. Minnisvarði um hjónin Thor Jensen og Margréti, 1988, við Fríkirkjuveg 11. Minnisvarði um Albert Guðmundsson, 2009, við Laugardalsvöll. At the Horizon, 2001, Þorlákshöfn. Flying mind, 2005, Selfoss. Dyr Seðlabanka Íslands, 1986. Án titils, 1982, Grasgarðinum í Laugardal. Minnismerki Kaldalóns, 1978, Grjótaþorpinu í Reykjavík.

Helgi Gíslason er fæddur í Reykjavík árið 1947. Hann stundaði nám við Myndlista- og handíðaskóla Íslands 1965-69, var í frjálsri myndlistardeild við sama skóla 1970-71 og Valand listaháskóla Gautaborgar 1971-76.

Sýningarstjórar eru Sigurður Trausti Traustason og Yean Fee Quay. Arna Schram, sviðsstjóri menningar- og ferðamálasviðs Reykjavíkurborgar opnar sýninguna. 

Síðasti listamaðurinn í sýningaröðinni í Ásmundarsafni á árinu, eftir að sýningu Helga lýkur, er Ólöf Nordal. 

Árið 2019 er ár listar í almannarými hjá Listasafni Reykjavíkur og er sýningin liður í því markmiði safnsins að beina sjónum manna að þeim listaverkum sem við njótum sem hluta af daglegu lífi.