Sýningaropnun – Emma Heiðarsdóttir: Jaðar

Sýningaropnun – Emma Heiðarsdóttir: Jaðar

Sýning á verkum Emmu Heiðarsdóttur, Jaðar, verður opnuð í D-sal Hafnarhússins, fimmtudag 15. ágúst kl. 20.00. Emma er 39. listamaðurinn sem sýnir í sýningaröðinni í D-sal, þar sem listamönnum er boðið að halda sína fyrstu einkasýningu í opinberu safni. 

Á sýningu Emmu Heiðarsdóttur setur hún fram vangaveltur um stund og stað myndlistar. Hvar og hvenær hefst listupplifun, hve lengi varir hún og hvert ferðast hún með áhorfendum? Listaverkið leikur venju samkvæmt lykilhlutverk í öllu þessu ferli sem og sýningarstaðurinn – listasafnið. Emma snýr upp á þessa þætti og fær sýningargesti til að staldra við og íhuga reynslu sína.

Verk Emmu teygja sig út fyrir sýningarrýmið en samt sem áður þarf áhorfandinn að vera inni í sýningarrýminu til þess að skynja verkið. 

Emma er fædd 1990, nam myndlist við Listaháskóla Íslands 2010-13 og stundaði framhaldsnám við listaháskólann í Antwerpen þaðan sem hún útskrifaðist 2018. Verk hennar byggjast á inngripi í þau rými sem hún sýnir í auk sjálfstæðra þrívíðra verka og myndbandsverka.

Sýningarstjóri er Markús Þór Andrésson, deildarstjóri sýninga og miðlunar hjá Listasafni Reykjavíkur.

Emma Heiðarsdóttir verður með leiðsögn um sýningu sína fimmtudaginn 22. ágúst kl. 20.00.

Sýningaröðin í D-sal hóf göngu sína árið 2007. Hér er listamönnum, sem hafa mótandi áhrif á íslenska myndlistarsenu, boðið að halda sína fyrstu einkasýningu í opinberu safni.