Á annað hundrað vilja gera listaverk í Vogabyggð | listasafnreykjavikur.is

Á annað hundrað vilja gera listaverk í Vogabyggð

Á annað hundrað vilja gera listaverk í Vogabyggð

Þátttaka fór fram úr björtustu vonum en 165 myndlistarmenn lýstu yfir áhuga á því að vinna útilistaverk í Vogabyggð í Reykjavík í samkeppni sem Reykjavíkurborg hleypti af stokkunum í apríl. Samkeppnin var auglýst alþjóðlega og eru 70% umsóknanna frá listamönnum búsettum erlendis.

Forvalsnefnd fer nú með það verkefni að velja úr innsendum umsóknum allt að átta listamenn eða hópa til þess að vinna að tillögum að listaverkum. Vegna fjölda umsókna hefur nefndin áskilið sér lengri frest til þess að fara yfir umsóknirnar og stefnir að því að hafa lokið störfum þann 28. maí.

Listamennirnir/hóparnir sem verða fyrir valinu fá greiddar 600.000 kr. hver fyrir tillögugerðina.

Samkeppnin er haldin samkvæmt samkeppnisreglum Sambands íslenskra myndlistarmanna (SÍM).

Forvalsnefnd er skipuð þremur fulltrúum: Frá menningar- og ferðamálaráði Reykjavíkurborgar, frá innkaupanefnd Listasafns Reykjavíkur og frá SÍM.

Nánari upplýsingar um samkeppnina í Vogabyggð má finna hér.